әскери саясат

(Военная политика)

мемлекеттердің әскери ұйым құрумен, саяси мақсаттарға жету үшін қарулы күш жұмсау құралдарын дайындаумен және қолданумен тікелей байланысты қарым-қатынасы мен іс-әрекеті. Ә.с. өзінің маңызы мен мазмұны жағынан мемлекеттің жалпы саясатының құрама бөлігі болып табылады.

Мемлекеттердің Ә.с-ы әскери доктриналарда, олардың әскери стратегияларында, әскери құрылыс практикасында нақтыланады. Әскери стратегия саясатқа бағынышты жағдайда болғандықтан, оған кері әсер береді. Мұндай өзара байланыстылық соғыс кезеңінде, яғни әскери жағдайлар қоғам өмірінде шешуші мәнге ие болғанда ерекше сезіледі. Ә.с., әдетте, мемлекеттің әскери ұйымы жүйесінің жұмысын заңды қамтамасыз ететін, заңдарға және де басқа құқықтық нормаларға сәйкес қарулы күштердің өмірі мен қызметін анықтайтын әскери заңдардың белгілі бір нормаларында бекітіледі. Соғыспен, оны дайындаумен және жүргізумен тікелей байланысты адамзаттың қоғамдық әрекетінің сферасы Ә.с-тың негізгі объектісі және ол мемлекеттің әскери қуатын құру мен қолдануға бағытталған. Ә.с. ықтимал қарсыластардың күш-қуатын, әр түрлі потенциалдарды, мемлекеттің экономикалық, саяси-моральдық, ғылыми және әскери күш-қуатын құрайтын, соғыстың барысы мен нәтижесін айқындайтын әскери факторларды талдауға негізделеді. Ә.с-та мемлекеттің әскери ұйымын құру, нығайту және жетілдіру, қарулы күштерді техникалық жабдықтау, қару-жарақ пен әскери техниканы дамытудың келешегін, мемлекеттің жұмылдырушылық мүмкіндік-терін анықтау, әскери іске оқытылған резервтерді дайындау, қажет болған жағдайда оларды жұмылдыру мәселелері негізгі орын алады.